काठमाडौँ – कञ्चनपुरमा १३ बर्षकी बालिका निर्मला पन्तलाई बलात्कारपछि हत्या गर्ने अभियुक्त पक्राउ परेका छन् । प्रहरीले घटना भएको २५औँ दिनमा स्थानीय युवक दिलिपसिंह बिष्टलाई पक्राउ गरेको हो ।

प्रहरी स्रोतका अनुसार बिष्टले बलात्कारपछि हत्या गरेको स्वीकार गरेका छन् । भीमदत्त नगरपालिका–२ उल्टाखामकी १३ वर्षीया बालिका निर्मला पन्त साउन १० गतेदेखि हराएकी थिईन् । उनको शव ११ गते भेटिएको थियो ।

पोष्टमार्टम रिपोर्टमा उनको बलात्कारपछि हत्या भएको पुष्टि भइसकेको छ । केन्द्रीय अनुसन्धान ब्यूरो र कञ्चनपुर प्रहरीको टोलीले अभियुक्तलाई पक्राउ गरेको हो ।

उनलाई सोमबार नै जिल्ला अदालत कञ्चनपुरमा उपस्थित गराइएको छ । अदालतबाट थुनामा राख्न म्याद लिएपछि उनलाई सोमबार नै सार्वजनिक गर्ने तयारी प्रहरीले गरेको छ ।

प्रहरीले अभियुक्तका रुपमा सार्वजनिक गरेका भीमदत्त नगरपालिका-१९ बस्ने दिलिपसिंह विष्ट ‘मानसिक सन्तुलन गुमाएका’ व्यक्ति रहेको र भिनाजुको हत्यामा ९ वर्ष जेल बसेर जेठ ०७४ मा छुटेको प्रहरीको भनाइ छ ।

बिष्टले गाँजा र मादक पदार्थ सेवन गर्ने गरेको, परिवारकै महिला सदस्यलाई पटक-पटक यौन दुव्र्यवहारको प्रयास गरेको, बाटोमा महिलालाई देख्दा अश्लील हर्कत गर्ने गरेको, जिल्ला कारागारमा आएर माग्ने गरेको र घरमा बाहिरै सुत्ने गरेको प्रहरीको प्रेस नोटमा उल्लेख छ ।

आफू एक पटक जेल बसेर आएको र फेरि सबैलाई मारेर जेल जान्छु भन्ने गरेका कारण परिवारमा समेत कुनबेला के घटना घटाउने हो भन्ने त्रास समेत रहेको अवस्थामा निर्मलाको हत्या हुन पुगेको प्रहरीले जनाएको छ ।

बलात्कारपछि हत्या गर्नेलाई पक्राउ गरेर कारबाही गर्न माग राख्दै स्थानीय बासिन्दाले बजारमा दिनहुँजसो प्रदर्शन गरेर प्रहरीलाई दबाब दिएका थिए ।

कञ्चनपुर प्रहरीका प्रवक्ता तथा प्रहरी नायव उपरीक्षक ज्ञान बहादुर सेटीले केहीबेरमा घटनाबारे पत्रकार सम्मेलन गर्ने जानकारी दिएका छन्।

तपाईको प्रतिक्रिया