बाबुरामले किन भने ‘म फेरि एकपटक बहुलाएको छु’ ?



काठमाडौ । जनता समाजवादी पार्टी (जसपा) का संघीय परिषद् अध्यक्ष डा। बाबुराम भट्टराई सामाजिक सञ्जालमा निकै सकृय छन् । उनले आफु गएका स्थानका तस्बिर सामाजिक सञ्जालमा सार्वजनिक गर्छन । कुनै पनि विषयमा तत्काल प्रतिकृया पनि जनाउँछन् । उनका भनाई र प्रतिकृया प्रति आएका टिप्पणीको खासै वास्ता गर्दैनन् ।

डा भट्टराईले परिवर्तनका लागि आफु फेरी एक पटक बहुलाएको बताएका छन् । इलामको फिक्कलमा जसपाले आयोजना गरेको सभालाई सोमबार सम्बोधन गर्दै पूर्वप्रधानमन्त्री भट्टराईले प्रतिगामी शक्तिहरुले आफूलाई बहुला भन्दै आएको प्रसंग निकाल्दै सकारात्मक परिवर्तनका लागि सचेत नागरिक बहुलाउनै पर्ने टिप्पणी गरेका हुन् ।

‘परिवर्तनका लागि विद्वानहरु बहुलाउन जरुरी छ‚’ उनले भने‚ ‘परिवर्तका लागि पहिले पनि बहुलाएर क्रान्तिको बिगुल फुकेकै हो, म फेरि एकपटक परिवर्तनका लागि बहुलाएको छु।’

जसपा पुरानो सोच र सिद्धान्त बोकोको पार्टी नभएर नयाँ सोच, दृष्टिकोण र सिद्धान्त बोकेको पार्टी भएको दावी गर्दै उनले संविधान संशोधन हुनुपर्ने बताए । उनले नेकपा एमाले अध्यक्ष केपी शर्मा ओलीको आलोचना गर्न पनि बाँकी राखेनन् । आफ्नै पार्टी जोगाउन नसक्ने ओलीले राष्ट्रियताको कुरा गर्न नसुहाउने बताए । ‘देश बनाउन त परै जाओस्, आफ्नै पार्टीलाई सम्हाल्न नसकेर तहसनहस बनाएका उनैले अहिले राष्ट्रियताको चर्को कुरा गरिरहेका छन्।’

नोट : etajakhabar मा प्रकाशित कुनै समाचारमा तपाईंको गुनासो भए, कुनै विचार वा विश्लेषण, सल्लाह र सुझाव र समाचार प्रकासित गर्नु परेमा वा बिज्ञापन दिनु परेमा हामीलाई [email protected] मा इमेल गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
प्रतिक्रिया दिनुहोस्