काठमाडौंमा पनि भित्रियो बर्ड फ्लू, कुखुरा, ५ परेवा, ३ लौकाट नष्ट



काठमाडौं:

केही दिन अघि चितवनमा देखिएको बर्ड फ्लू काठमाडौंको गोकर्णेश्वरमा बर्ड फ्लू  देखिएको छ । गोकर्णेश्वर नगरपालिका–३ मा वर्ड फ्लू भेटिएको स्वास्थ्य तथा जनसंख्या मन्त्रालयले जनाएको छ ।

गोकर्णेश्वर नगरपालिका-३ स्थित एक फर्ममा पालिएका कुखुराको नमुना परीक्षण गर्दा संक्रमण पुष्टि भएको हो । केन्द्रीय पशुपन्छी रोग अन्वेषण प्रयोगशाला त्रिपुरेश्वरमा गरिएको परीक्षण बर्ड फ्लू संक्रमण पुष्टि भएको मन्त्रालयले जनाएको छ । बर्ड फ्लू नियन्त्रणको प्रयास भइरहेको र सावधानी अपनाउन मन्त्रालयले आग्रह गरेको छ ।

एपी वान इन्फुलुन्जा संक्रमण भएको र यसले मानिसलाई पनि संक्रमण गराउन सक्ने भएकाले मन्त्रालयले सावधानी अपनाउन भनेको हो । केन्द्रीय पशुपन्छी रोग अन्वेषण प्रयोगशालामा कुखुराको नमुना परिक्षण गर्दा बर्ड फ्लु पुष्टि भएको पशु सेवा विभागले जनाएको छ । त्यसैगरी चितवनको राप्ती नगरपालिका–६ स्थित अनिता पशुपक्षी कृषि फर्ममा बर्डफ्लू देखिएको हो ।

रोग पुष्टि भएको क्षेत्रबाट रोग अन्यत्र फैलन नदिई तत्काल नियन्त्रणमा लिन संघ, प्रदेश तथा स्थानीय तहका पशु सेवासँग सम्बन्धित निकायहरूलाई परिचालन गरीएको छ ।यसै क्रममा पशु सेवा विभाग कृषि तथा पशुपन्छी विकास मन्त्रालय, बागमती प्रदेश, जिल्ला प्रशासन कार्यालय, काठमाण्डौ, भेटेरिनरी अस्पताल तथा पशु सेवा विज्ञ केन्द्र, ललितपुर, गोकर्णेश्वर नगरपालिका लगायतका निकायहरुको समन्वयमा रोग नियन्त्रणको लागि खटिएको टोलीले रोग देखिएका क्षेत्रमा रहेका सम्पूर्ण स्थानीय कुखुरा, अण्डा, दाना लगायतका रोग सार्न सक्ने अन्य वस्तु समेत नष्ट गरी रोग नियन्त्रण गरेको छ।

उक्त टोलीले २० स्थानीय कुखुरा, ५ परेवा, ३ लौकाट नष्ट गरी सुरक्षित तवरले डिस्पोज गरिएको छ। यसै गरी पशु सेवा विभाग, कृषि तथा पशुपन्छी विकास मन्त्रालय, बागमती प्रदेश, जिल्ला प्रशासन कार्यालय, चितवन, राष्ट्रिय पन्छी रोग अन्वेषण प्रयोगशाला भरतपुर, भेटेरिनरी अस्पताल तथा पशु सेवा विज्ञ केन्द्र, चितवन, राप्ती नगरपालिका लगायतका निकायहरुको समन्वयमा रोग नियन्त्रणको लागि खटिएको टोलीले रोग देखिएको क्षेत्रमा रहेका १९१३ गोटा लेयर्स कुखुरा, १४ गोटा हाँस, २० गोटा हाँसको अण्डा, १००० के।जी। दाना र ३५० गोटा अण्डाको केट नष्ट गरी सुरक्षित तवरले डिस्पोज गरिएको छ। साथै रोग देखापरेको क्षेत्रलाई पूर्ण निसंक्रमण समेत गरिसकिएको छ।

विगत एक महिनादेखि मोरङ जिल्लाका विभिन्न स्थानमा देखिएको बर्ड फ्लु रोग नियन्त्रण गरी सो क्षेत्रमा सघन निगरानी कार्य भैरहेको पनि विभागले जनाएको छ । सरकारले बर्डफ्लु रोग नियन्त्रणको लागि संक्रमण पुष्टि भएको क्षेत्र लगायत अन्य क्षेत्रहरुमा नियमित रुपमा सघन रोग सर्भिलेन्स, नमूना संकलन तथा प्रयोगशाला परीक्षणको कार्यक्रम संचालन गरिरहेको हो।

नोट : etajakhabar मा प्रकाशित कुनै समाचारमा तपाईंको गुनासो भए, कुनै विचार वा विश्लेषण, सल्लाह र सुझाव र समाचार प्रकासित गर्नु परेमा वा बिज्ञापन दिनु परेमा हामीलाई [email protected] मा इमेल गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
प्रतिक्रिया दिनुहोस्