महानगरपालिकामा यसरी मिलाए गठबन्धनले भागवण्डा, चितवनमा कांग्रेसले मान्ला केन्द्रको निर्णय ?



काठमाडौ । सत्ता गठबन्धनले ६ वटा महानगरपालिकामा भागवण्डा मिलाएका छन् । चितवनमा नेपाली कांग्रेसले आफ्नो उम्मेदवारी नछोड्ने निर्णय औपचारीक रुपमा लिएपछि समस्या उत्पन्न भएको थियो । तर केन्द्रमा भने नेताहरुले सहमति गरेका छन् । शीर्ष तहमा चार दलबीच महानगरको भागवण्डाबारे अनौपचारिक सहमति जुटेको बताइएको हो ।

स्थानिय तहमा आफै उम्मेदवारी घोषणा गरेकाहरु प्रचारमा लागिसकेका छन् । तर केन्द्रमा नेताहरुले कांग्रेसले तीनवटा महानगर, माओवादी केन्द्र, एकीकृत समाजवादी र जसपाले एक एकवटा महानगरको नेतृत्व लिनुपर्नेमा सहमति नजिक पुगेका छन् । अझै छलफल भइरहेको एकीकृत समाजावादीका एक नेताले बताए ।

भरतपुर प्रचण्डको गृहजिल्ला भएका कारण पनि माओवादीको दाबी पहिलादेखि नै भरतपुर महानगरमा थियो । तर कांग्रेसले औपचारीक निर्णय गर्दै भरतपुरमा आफुहरुको दावी रहेको सूचना सार्वजनिक गरिसकेका छन् । जिल्लास्तरीय नेताहरूको दाबी र लविङ पनि चर्को देखिएको छ । तर केन्द्रमा भने कांग्रेस सभापति तथा प्रधानमन्त्री शेरबहादुर देउवा भरतपुर माओवादीलाई छोड्न अनौपचारिक रूपमा सहमत भइसकेका छन् ।

भरतपुरमा शेखर कोइरालाका कारण समस्या उत्पन्न भएको देउवाको बुझाइ छ । कांग्रेसले विराटनगर, काठमाडौं र ललितपुर महानगर लिने सम्भावना बढेको छ । जसपाले वीरगञ्ज पाउने पक्कापक्कीजस्तै छ ।

माओवादीले भरतपुर महानगर पाउने अवस्थामा एकीकृत समाजवादीले भने पोखरा महानगर पाउने सम्भावना बलियो छ । कांग्रेसभित्र कतिपय नेताहरूले एकीकृत समाजवादीलाई काठमाडौंमा उपमेयर दिएर पोखराको मेयर लिनुपर्ने भन्दै देउवा समक्ष लविङ गरेका छन् । एमालेले जितेका महानगरमध्ये आधा आफूले पाउनुपर्ने अडानमा एकीकृत समाजवादी छ । कांग्रेसले काठमाडौं महानगर नछोड्ने भएकै कारण पोखरा समाजवादीको भागमा पर्ने सम्भावना देखिएको हो ।

नोट : etajakhabar मा प्रकाशित कुनै समाचारमा तपाईंको गुनासो भए, कुनै विचार वा विश्लेषण, सल्लाह र सुझाव र समाचार प्रकासित गर्नु परेमा वा बिज्ञापन दिनु परेमा हामीलाई [email protected] मा इमेल गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
प्रतिक्रिया दिनुहोस्