यसकारण स्ट्रिमिङ साइट्सले हटायो चर्चित डान्सर माइकल ज्याक्सनका तीन गीत



लसएञ्जल्स, २३ असार:

विश्वविख्यात पप गायक तथा डान्सर माइकल ज्याक्सन प्रायः आफ्नो गीतका कारण चर्चामा आइरहन्थे । भलै उनी अहिले संसारमा नभए प्नि उनको गीतले अझै दर्शकलाई मनोरञ्जन दिइरहेको छ । यहीबीचमा दिवंगत गायकसँग जोडिएको एक खबर बाहिर आएको छ ।

हालै मात्र माइकलका तीन गीतलाई स्ट्रिमिङ साइट्सबाट हटाइएको छ । माइकलका यी तीन गीतलाई लामो समयदेखि अरुकै गीत भनेर दाबी भइरहँदा स्ट्रीमिङबाट हटाइएको हो ।

सन् २०१० मा बजारमा आएको एलबम ‘माइकल’मा ‘ब्रेकिङ न्यूज’, ‘मोन्स्टर’ र ‘किप योर हेड अप’ गीत समावेश थिए । यो गीतलाई माइकलको निधनको एक वर्षपछि सार्वजनिक गरिएको थियो । यो गीत सार्वजनिक हुनासाथ केही फ्यानले गीतमा अमेरिकी गायक जेसन मलाचीको ओरिजिनल स्वर रहेको दाबी गरेका थिए । यद्यपि, सोनीले यी सबै दाबी अस्वीकार गरेको थियो ।

रेकर्ड कम्पनी र ज्याक्सनका प्रतिनिधिले गीतमाथि भइरहेको विवादलाई सरल र सजिलो तरिकाले समाधान गर्न गीत हटाउने निर्णय लिएको जानकारी दिएको छ । तर, गीतको प्रमाणिकरणका विषयमा कुनै शंका नगर्न उनीहरुले आग्रह गरेका छन् । उनीहरुले स्ट्रीमिङ साइट्समा एल्बमका अन्य सात गीत भने उपलब्ध हुने उल्लेख गरेका छन् ।

माइकलले सन् २००७ मा निर्माता एडवर्ड क्यासियो र जेम्स पोर्टेसँग यो गीत लेखेर रेकर्ड गरेका थिए । तर, गीत रेकर्ड भएपछि उनका परिवारका केही सदस्य तथा प्रशंसकले ‘के गीतमा माइकलकै स्वर थियो त रु’ भनी सन्देह व्यक्त गरेका थिए ।

सन् २०१४ मा प्रशंसक वेरा सेरोवाले क्यालिफोर्नियामा सोनी, ज्याक्सनका स्टेट, क्यासियो र पोर्टेविरुद्ध उपभोक्तासँग झुट बोलेको आरोप लगाउँदै उजुरी दिएका थिए । यद्यपि, अदालतले सन् २०१८ मा सोनी र एस्टेटको पक्षमा फैसला सुनाउँदै उजुरी खारेज गरेको थियो । त्यसपछि सरोवाले क्यालिफोर्नियाको सर्वोच्च न्यायालयमा अपिल गरेका थिए । तर, न्यायाधीशहरुले भने यो विषयमा कुनै सुनुवाई गरेनन् ।

नोट : etajakhabar मा प्रकाशित कुनै समाचारमा तपाईंको गुनासो भए, कुनै विचार वा विश्लेषण, सल्लाह र सुझाव र समाचार प्रकासित गर्नु परेमा वा बिज्ञापन दिनु परेमा हामीलाई [email protected] मा इमेल गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।
प्रतिक्रिया दिनुहोस्